Hochzeits ABC
Bsonders för öisi gladne Gest intressant, aber ou Aperogest sind willkomme zom drenne omeschnöige:
Afahrt: E Wägbeschribig zom Aperoort fendet der of dere Homepage. D'Fahrt vom Apero zom Festort ofem
Engelberg erfolgt individuell. Düend öich doch zo Fahrgmeinschafte zämeschliesse. Wenn öper ke Möglechkeit het,
säuber ofe Bärg z'cho, bitte be öis mäude.
Blueme: Hei mer zwar sehr gärn, sind aber a däm Tag ned bsonders praktisch...
Creme ond wiss: Die Farbe sind a däm Tag e dr Brut vorbehaute.
Dresscode: Mer wänd öich öisi Hochzitsgarderobe ned vorenthalte. Es wär schön, wenn der öich chli usepotzet,
wenn dr weit chöit dir euch ou in Schale wärfe, d Houptsach esch aber, dass dir öich drin wohl fühlet!
Esse: Werds gnueg för aui gä. Vegis ond Allergiker gäbe das bitte be dr Amäudig a.
Fotografiere: Dr Igor werd probiere es paar gueti Schnappschöss z'mache. Der sit aber härzlech iglade, ebefaus
z'fötele. Mer wörde öis fröie, wenn der öis öichi Böuder wördet zor Verfüegig stöue.
Gschänk: Met öich das wechtige Ereignis dörfe z'fire esch för öis Gschänk gnueg. Wär trotzdäm öpis wett schänke,
fendet e öisem Wonschbuech of dere Homepage Aregige.
Hochzitsposcht: För Chärtli ond Ähndlechs stot en Hochzitsbriefchaste parat.
Idee ond Biträg sind härzlech willkomme. Bitte nämet aber onbedingt met öisne Trouzüge Kontakt uf, damet secher
aues klappet!
Ja! S'wechtigschte Wort för öis em Oktober.
Kino ond Föum: Eis vo öisne gmeinsame Hobbies ond öises Motto förs Fäscht.
Liebi: Der einzige Grond werom dass mer "Jo" säge!
Musig: Werds vorussechtlech ab em Band gä. Das söu öis ned dra hendere usgibig s'Tanzbei z'schwenge!
Nachwochs: Esch ned onderwägs. Mer wänd nochli öisi Zwöisamkeit gniesse bevor mer öis (velecht!) a
d'Familieplanig mache.
Ohni Öichi A- oder Abmäudig müend der leider en Klappstueu ond es Lunchpaket metnä. De chöi mer öich nämli ke
sechere Platz garantiere. Auso hautet doch bitte d'Röckmäudefrist i. A- und abmäude chöit dir öich telefonisch, per
Mail oder met em Amäudetalon.
Persöndlech: Mer wönsche öis aus Adänke a dä Tag es Gästebuech. Es werd vor Ort uflegge. Bitte öberlegget öich
doch scho mau, was der möchtet ineschribe.
Querbeet osem Fröndes- ond Familiekreis wärde Lüt met öis fiire!
Restaurant: Wieso in die Ferne schweifen, wenn das Gute liegt so nah. Aus waschächti Igeboreni fiire mer öises Fest
im Restaurant Engelberg ofem Dulliker Husbärg.
Stauffiger: Sodeli, es get News zom Thema Familiename. Mer händ öis entschede, dass dr Stefan en Doppelname
werd füehre. D Corinne werd ehre bishärigi Name onveränderet bhaute.
Trouig: Am 31. Oktober werd ke Trouig stattfinde. S'Jo-Wort wärde mer öis vorhär e sehr chlinem Kreis gä. Mer
hoffe der respektieret öisi Entscheidig ond firet trotzdäm kräfig met!
Übernachtig: För die vo witer agreiste Gäst ond die wo nöm möchte heifahre. Ofem Engelberg stönd öis Zimmer zor
Verfüegig. Nöcheri Infos onder "Übernachtung" of dere Homepage.
Verreise: Öisi Flitterwoche wärde mer erst em 2010 aträte. Wohe dasses got? Kanada! Esch doch klar.
Wi ond Wasser: För beides söu zor Genüge gsorget si.
XY - ungelöst: Be Onklarheite bitte ongeniert mäude.
Yummie: So werd hoffentlech öises Hochzitsmenü
Zom Schloss: Mer fröie öis jetzt scho riesig met öich z'fire ond hoffe der brenget jede Mengi gueti Lune met!
Corinne und Stefan
Wir sagen Ja!